#الثائر

- " الخوري كامل كامل "

النجاح يعني اعمال وبس

العلماء يكشفون عن ميكروبات تعيش في المايكروويف

كتر الحكي ما بينفع

التاريخ بيعرف حقيقة كل واحد منكم

لشو كل هالدعايات

ولشو كل هالشدّ والقدّ وإتهام الناس ساعة بالعمالة وساعة بالرذالة..

اللعبة معروفة...

شفنا شطارتكن وين وصلتنا

وشفنا وطنيتكن شو عملت فينا

وما في لزوم نقول الله يحيينا ويرينا تنشوف قرعتكن..

شفنا كتير ودقنا التعتير

بكفي خلص راحت ولّت

الله يرحمنا ويرحمكن..

بس في قصة هالشيخ مع شواطىء جبيل وجونية ما بتمرق!! قول البدّك ياه انت حرّ.. حرّر وحرّض ولتّ حكي قد ما بدّك بس احترم موقعك والقيم إللي بتمثلها والدين اللابس عبايتو وبتحكي باسمو واذا ما بدّك

كمان انت حرّ..

جبيل فيها من كل الناس وهي بتمثل لبنان ع زغير ويمكن ما بتعرف سماحتك انو فيها شيعة وسنة ومسيحية من أهل البلد وعايشين مع بعض ع الحلوة والمرّة ومرقت كل الحرب بكل بشاعتها ولمعلوماتك ما حدا تهجّر من أبنائها..

وانا علّمت بأكبر وأقدم مدارسها لاكتر من عشرين سنة تعليم مسيحي وكان عندي تلاميذ من كل جبيل ومرّة عملنا مسابقة ع مستوى لبنان طلعت الاولى تلميذتي من بيت حيدر وابن المفتي إللي هو هلق شيخ عطانا درس عن مريم بالقرآن الكريم ولمن نعمل زياح القربان بكل محبة واحترام يعطونا محلّ بمجمع بيت مشرف بالشارع الرئيسي..

يمكن سماحتك ما زرت ولا مرّة مار شربل وما مرقت بكل هالضيع وما شفت انو أهل جبيل ما بتقدر تعرفن من بعضن واكيد ما بتقدر تفرقن عن بعض.. ولمن بتشوف كل هالحضارة وهالرقي والتاريخ المليان حب وعنفوان منّك لحالك رح تخجل من كلامك..

بدعيك تزور جونية وجبيل بس ركز ع يمينك، يسوع الملك ع بوابة جونية وسيدة لبنان ع تلة حريصا ليش ركّزت بس عالشطّ مع انو كل الناس بينزلوا ع البحر ومش كل مين نزل عالبحر صار بلا أخلاق.. ومش كل مين لبس العباية صار قديس شو عرّفك بالقلوب؟!! يا ما تحت السواهي دواهي!!

معليش مش مقبول تكون أعراض الناس لشدّ العصب الانتخابي واذا حضرتك عم تحذّر بيئتك من انتخاب إللي بتعتبرهن خصومك ما تقرّب عالمحرمات ولا تدقّ بالمقدسات هودي بناتنا وزوجاتنا واماتنا شرفهن غالي علينا.. خدها متل ما هيي طلع شوي من القبو القاعد فيه بلكي بتشوف النور!!