#الثائر

الشاعر سهيل صقر : منطقة وادي التيم

هون الشعر.. عا نغمتي تجلّى

هون الوقت عن ساعتو تخلّى

هون المشاعر سقسقوا بالروح

هون .....وْلا مرّة عاتَبِتْ الله

هون القلب لا تحسَّر ولا جاع

وخيط الرهافةِ قطَّب الاوجاع

هون اتكَل عا مْشاعرو البيّاع

وكتف النهر عَ بضاعتو صلّى

هون العشق ما خَسَّر العشاق

وخصر الورد للمُغرَم بيشتاق

هون لْ خَلقني بالشعر دفّاق

وقلّي يا شاعر ..مَنبَري تولّى

هون الحكي بيناتنا بالهمس

وخدود عم تعرق ندي ع اللمس

هون البدر ما ختيَر وبالشمس

قلبو اندبق وبشَعرها تسلّى

هون التقوا الصفصاف والكينا

وذابوا عا غنّية "سوى ربينا"

هون النحل قطَّف "أسامينا"

وعا صوت فيروز الشهد ملّى

هون السَمَر وبضيعتي حَسَّيت

سكران قنديل السما مْن الزيت

وقدّيش بعروقي شعر خبَّيت

وعمَّرلِكْ جنوني بخَيالو بيت

تا تفوع منك شهقة لْ ياريت

ويقول تمّ ...لْ مَبْسمو حبَّيت

تفضَّل يا شاعر جيلك ..تحلّى