| تابعنا عبر |
|
 |
الثائر تقدم لكم تقنية الاستماع الى مقالاتها علّم أي مقطع واستمع إليه
بعاهدكن انو ابقى متل ما تعلمت بمدرسة القائد، الولاء للوطن والوفاء لرفاقي
#الثائر
قال المرشح عن مقعد الارمن الاورتوذكس في المتن الشمالي ريكاردو ملاكيان خلال مهرجان لائحة "كنا ورح نبقى للمتن" الذي أقيم في الجديدة بحضور أعضاء اللائحة ورئيس التيار الوطني الحر النائب جبران باسيل : "دايماً بيسألوني بعدك شاب ليش ما بتهاجر؟ وأنا جدّي تهجّر من أرضو وإجا علبنان وداق العذاب ليستقر بهالأرض، ومن بعدو بيي كمّل المسيرة، لوين بدّي هاجر واترك لبنان اللي قدّم كتير شهدا ليبقى الوطن؟ انا شاب لبناني من اصول ارمنية وبعشق الارض، واللي خسر أرضو هوي الوحيد اللي بيعرف معنى الوطن. نحنا الأرمن، عملوا فينا مجازر بال1915 وحاولوا يلغونا ولكن فشلوا وبعد 60 سنة إجا عا لبنان مين يعمل صفقة لترحيل المسيحيي وصارت الحرب اللبنانية، وبعد 17 سنة يعني اليوم عم يحاولوا يغيروا وج لبنان من خلال صفقة القرن والتوطين وتثبيت النازحين وترسيم الحدود البحرية عا ذوقهم، اي لأ كمان مارح تقطع، لأنو في رئيس اسمو الجنرال ميشال عون وقف بوجهم ورفض كل الصفقات. كيف بدّي هاجر وخون كل اللي سبقوني بالنضال وناضلوا من اجل بقاء لبنان واستشهدوا، انا خلقت من رحم النضال وباقي حرس الشهدا وحرس الحرية والسيادة والإستقلال، وحرس القضيّة، وحرس الهويّة، وحرس القدّيسين والكنائس والمعابد. وقت اللي بهاجروا رفات مار شربل والحرديني ورفات كل الشهداء انا بهاجر."
وتوجه ملاكيان للنائب باسيل بالقول : "اسمحولي اشكر الرئيس جبران باسيل على ثقتو فيي وبترشيحي. انا كمناضل بالتيّار الي 27 سنة وفي لمسيرة العماد ميشال عون، بعاهدكن انو ابقى متل ما تعلمت بمدرسة القائد، الولاء للوطن والوفاء لرفاقي، اليوم كان دوري بالترشح وبكرا دور غيري من المناضلين. شكراً President جبران."
كتار منكن بيعرفوني من ايام النضال من اجل تحرير لبنان وفي كتار منكم تعرّفوا عليي بآخر سنتين من خلال واجباتي اللي عملتا بزمن كورونا وانفجار 4 آب المشؤوم، وفي كتار منكم شافوا قدّيش انا انسان صلب رغم كل الظروف وانا بأكدلكن انو كنت ورح ابقى متل ما انا الوطني والحر والسيّد والمستقل.
وتابع::" المتن هوي قلب لبنان النابض، قلبو التجاري، قلبو السياحي، وقلبو الصناعي. مرق بفترات عصيبة كتير بس هلق صار الوقت انو يرجع لزمنو الجميل، لازم ترجع المصانع والمعامل تنتج بالمتن وتصدّر للخارج كرمال يرجع اقتصادنا منتج ومش ريعي. المتن اجمل واحسن نموذج للامركزية الادارية والمالية الموسعة، المتن في مستشفيات حكومية وخاصة، جامعات ومدارس حكومية وخاصة، في مصانع ومعامل وشركات تجارية وفي مجمّعات تجاريّة وسياحيّة، في ساحل ووسط وجرد، في بحر وفي تلج (وصار الوقت انو نشيل التلوث من بحرنا ويكون عنا اهم واجهة بحرية) في عنا سياحة دينيّة وثقافيّة واثريّة، وطبيّة وتجميليّة، في معالم اثريّة كتير مهمة ومن ابرزها صخور الجلاء الشاهدة على جلاء جميع الجيوش من لبنان وقريباً رح تشهد على جلاء الفاسد والفاسدين من خلال التدقيق الجنائي اللي عرّابو هوي الرئيس العماد ميشال عون والتيار الوطني الحر. رح نسترد الاموال المنهوبة والمحوّلة ورح نطلّع الغاز من البحر ومن البر كمان ورح نحافظ عا كرامتكن ونرجّع ولادكن اللي هاجروا."
واضاف: "وقت الجنرال عون نادى بتحرير لبنان بال 89 اخدت معن 16 سنة تلاقونا عا خطاب التحرير، نحنا اليوم عم ننادي بنظام جديد، بالدولة المدنية، ببناء دولة عادلة لجميع اللبنانيي، انشالله ما تاخد معهم 16 سنة تانيين ليلاقونا عا خطاب التحرر، التحرر من الفساد، التحرر من التبعية، والتحرر من الطائفية.
ما رح قول ما خلونا رح قول ما لاقونا، ما لاقونا عالتغيير وقت اللي كنا اول مين نادى وسعى وقدم قوانين للتغيير بالمجلس النيابي وهني وقفوا ضدنا، نحنا اللي كنا نبض التغيير وقلب التغيير وثورة التغيير بالسابق وبعدنا لليوم ورح نبقى للمستقبل."
وتابع: "لبنان ما بقوم الا بشبابو ولو جبنا مال الدني وشبابنا بالخارج ما رح يزبط الوطن، رح نشتغل بكل قوّتنا لنأمن للشباب فرص عمل وبيئة آمنة لنرجع نستثمر بأهم عنصر قوة عنا ياه، واللي هوي عنصر الشباب، امهاتنا ما خلّفوا ليتعبوا ويربّوا ويكبّروا ويصدّروا ولادن لبرّا.
بالآخر بدي قول انو من 3 ايام كان عيد عودة الوطن الى الوطن (عودة الجنرال للبنان ) بتتذكروا التسونامي ب 7 ايار 2005؟ هيدا التسونامي راجع ب 15 ايار. ب15 أيار بدنا نعيّد عودة الروح للوطن عودة الحياة للوطن عودة الشباب للوطن وعودة امالنا ومصرياتنا واحلامنا للوطن."
وختم بالقول: "انتحبوا صح انتخبوا ضد المال الإنتخابي انتخبوا ضد الرشوة، انتخبوا لكرامتكم اللي ما الها ثمن، انتخبوا للحرية، نحنا المتنيين لا مننشرى ولا مننباع، انتخبوا نهج الرئيس ميشال عون، النهج الإصلاحي، النهج النضالي اللي دفع اثمان كتيرة في سبيل بقاء لبنان وشعب لبنان العظيم، انتخبوا التيار الوطني الحر اتخبوا لايحة كنّا ورح نبقى للمتن انتخبوا لبنان الجديد.
عشتم، عاش التيار الوطني الحر، عاش المتن وعاش لبنان."
